買樓應該係每個澳門人人生必經之路，畢竟沒有人想長期租屋幫人供樓，為左快啲上車置業，結緍後我地兩個人努力打工湊錢，應慳得慳，最近終於成功湊夠首期。

定個預算

係時侯開始計劃買樓！第一步先要定個預算，我們是青年首置，用計算機計計應該可以揀到4xx萬的樓，這個計算幾準，因為所有費用佢都計哂。

了解行情

之後就開始到處周圍睇樓，了解下依家市場係咩情況先！我地會上網搵，搵岩再打電話約時間上門睇，行街經過地產鋪又會停低睇下，見到有興趣的會直接走入去約時間，係Facebook又會加下啲樓盤Group, 睇下有咩荀盤，不過不要加太多，不然你的最新動態會全部比佢地佔領哂。

小心中伏

睇樓的時候我覺得千奇唔好急唔好沖動，因為成日睇岩左一間之後又會搵到另一間更好的，又有時候都準備要落訂，但係係最後一刻先發現天花有漏水。。我地試過兩次了，真係唔知算好彩定唔好彩。

跟住有時又會搵到啲兇宅，但係地產又唔話你知！雖然我地每次睇樓都會問係唔係兇宅，但係為左安全起見我每次都要將個大廈名係Google搵下，睇下有無啲咩新聞有報道過兇案。

我地都睇過有啲單位係新裝修拿出來賣（但不是新樓），一開始以為業主只係想將間屋整靚啲賣個好價錢，但係遇到一個原來係為左遮掩牆身漏水發霉的問題，還好我地睇的時候是雨季，而且睇左兩次，最後才能發現，這類裝修一般是簡裝的，就是簡單油漆牆面就算了那種。

樓齡

樓齡方面不要太介意，因為年輕的不一定代表好！我地睇過不少樓齡廿幾年的樓，大約是199x年建成的，這個年代的樓。。。一般都比較差！遇到它們要特別留心，經常睇到天花有好多莫名奇妙的梁，間隔奇怪，樓底矮，牆壁和地面薄，拉水管的位置離奇，樓梯扶手鐵支腐蝕嚴重（可能係咸水樓，即用海水混入泥沙，鹽份過高令鋼筋快速老化）。反而比較老的的樓（接近四十年但不超過四十年），保養好的望落去比廿幾年的還新，特別係一啲有管理處的更好，怪不得經常有人說舊時的人做野手工做得比較好。

我覺得樓齡的問題主要係影響供樓年期，因為銀行有規定的，樓齡+供樓年期是不可以超過65年的，即係如果揀了40年的樓，銀行最多只可以比你供25年，唔可以供30年了！供的年期少左，每個月供款就會多左，呢個時候就要用計數機計下每個月夠唔夠錢供了。

天台

頂層的唐樓一般都包埋天台可以比業主用，有啲地產放盤就將天台的建築面積都加埋入去，所以有時見到有啲唐樓面積標示得好大的就要注意係唔係呢種，我自己睇樓時如果遇到呢種，一般都會自己減走天台的面積（直接除以2好了）。

查屋紙

如果有合心水的樓拎查屋紙睇下，查屋紙可以在網上申請下載（https://account.dsaj.gov.mo/eBusca.html），費用十蚊一張，十分方便但需要一戶通賬號，如果無一戶通賬號也可以去水坑尾公共大樓申請查屋紙，費用也是一樣十蚊，申請後不用半個鐘就有了，另外都可以叫地產幫你申請，有左查屋紙就可以睇到實用面積、樓齡和業主等等的重要資料。

面積計算

一般地產放盤都只會標示建築面積，老實說，建築面積真的不知道是誰想出來的，買樓看這個沒甚麼用，因為建築面積連單位外的公共地方都計埋，查屋紙又沒有這個數據，証實唔到真假，所以買樓要睇實用面積先有用！注意查屋紙上寫的實用面積單位是平方米(m2), 但是我們平時說的尺是平方英尺(sq.ft), 單位不一樣要換算, 1平方米等於10.76平方尺，即係大約10倍。

鎖定目標

我地睇樓揀樓一共差不多睇了二十多間，找過八九個地產，有時候一日會睇兩三間，多找不同的地產，不然同一個地產看太多次我也不好意思的。。每次上門睇完我都會話先返屋企考慮一下，總之就不要沖動，佢地經常都會加你微信，方便日後聯繫，跟住佢地會係朋友圈Post樓盤出來，得閒睇下都不錯。

整過揀樓過程經歷四個多月。。一開始係地毯式搜索，係Facebook、CTM論壇和各大地產網站先找找靈感睇下甚麼是好樓盤，之後就會知道自己想要甚麼的，要求就會越來越高，因為我們要返夜班，希望找位置在南灣、西灣的，環境比較寧靜，景觀開揚，返工交通也比較方便，知道自己要咩之後，就開始每日睇住個地圖搵樓，睇下呢啲區有無新盤出現，呢段時間最漫長，守株待兔左幾個月。

最後我地揀左個唐樓滿足了我所有的要求，價錢也合理，實用呎價大約港幣5250元，一共4xx萬，注意係澳門街買樓一般都係計港紙，拆算澳門幣一般係用1.0315的匯率計。


Find a house